പരേതൻ
അയാൾ മരിച്ചിരിക്കുന്നു..
ഇന്നെല്ല, എത്രയോ മുമ്പേ...
അത്മഹത്യയോ വധമോയെന്നറിയില്ല.
മരണം ആദ്യമായ് അറിഞ്ഞത്
അയാൾ തന്നെ.
തവണകൾ തെറ്റാതെ ലഭിച്ച റീത്തുകൾ
ഓരോന്നും മരണത്തെ പെട്ടെന്ന് എത്തിച്ചു.
പടിയിറക്കിയതിൽ പിന്നെ
അധികനാൾ അയാൾ ജീവിച്ചിരുന്നില്ല.
ഇവിടെയെവിടെയോ അയാൾ
നടക്കുന്നതു കാണാം.
ഉള്ളിൽ തിരികൊളുത്താൻ
കൊതിച്ചവൻ
ചാവേറായി
സ്വയം പൊട്ടിത്തെറിക്കുകയായിരുന്നു.
അയാൾ മരിച്ചിട്ടും
ചരമകോളത്തിൽ ചിത്രം പതിഞ്ഞില്ല.
വലിയ ഫ്രൈമുകളിൽ ഇടം നേടിയില്ല.
എന്തിന്
മരണം അവനൊഴിച്ചാരും
അറിഞ്ഞത് പോലുമില്ല!
അത്മാവിൻ പീഢ ജഢവുമായി അലയുമ്പോൾ ഉച്ചത്തിൽ ആയാൾ ചോദിച്ച് കൊണ്ടേയിരുന്നു
അത്മാവിനെ അടക്കം ചെയ്യുന്ന ശ്മശാനമെവിടെയാണ് കൂട്ടരേ....
എന്നിട്ടും,
ചുടലക്കാടോ സെമിത്തേരിയോ
അയാൾക്ക് കണ്ടെത്താനായില്ല.
Comments
Post a Comment